ბიბლიური ისტორიის საგნობრივი პროგრამა

ბიბლიური ისტორიის საგნობრივი პროგრამა

საგნის სწავლების მიზნები და ამოცანები:

• ბიბლიური ისტორიის მნიშვნელობის გააზრება;
• სამყაროს შექმნის ბიბლიური ისტორიის შესწავლა და მისი გააზრება;
• ბიბლიური მოვლენებისა და ფაქტების ანალიზის უნარის განვითარება;
• ბიბლიის როგორც სიცოცხლის წიგნის, როგორც საღმრთო გამოცხადების მემატიანის როლი, კაცობრიობის განვითარებაზე;
• ბიბლიური ისტორიის როგორც ზოგადსაკაცობრიო კულტურის შემადგენელი ნაწილის გაცნობიერება;
• ბიბლიური ისტორიის გააზრება სწავლის შემდგომი ეტაპისათვის და ზოგადად ცხოვრების მართებული წესის შესწავლისათვის;
• ბიბლიური ისტორიის გათვალისწინება ცხოვრებისეული ამოცანების გადასაწყვეტად და ამ ცოდნის გამოყენების უნარი;

ძირითადი უნარ-ჩვევები, რომელთა გამომუშავებასაც ხელს უწყობს ბიბლიური ისტორიის სასკოლო კურსი:
ბიბლიური ისტორიის შესწავლა ხელს უწყობს მოწაფეებს ჰქონდეთ სწორი და მართებული ცოდნა საყაროს შექმნაზე, ღმერთის მიერ გაცხადებული ჭეშმარიტების გაგებაზე, საღმრთო ისტორიის ცოდნაზე. ჰქონდეთ ცხოვრების აზრის შესახებ ნათელი და სწორი წარმოდგენა, ხელს უწყობს ცხოვრების აზრის ცოდნასა და გააზრებას და ამ ცოდნის არა მარტო შესაწავლას, არამედ მის გამოყენებას და ცხოვრების წესად ქცევას.

ბიბლიური ისტორიის სწავლების ძირითადი მიზნები დაწყებით და საბაზო საფეხურზე
სამყაროს შექმნა
აქ უმნიშვნელოვანესია მოხდეს გააზრება და პასუხის გაცემა ისეთ კითხვებზე როგორიცაა არსებობის შესახებ კითხვები. როგორ შეიქმნა სამყარო და ადამიანი? რა არის სიცოცხლე, რა აზრი აქვს ცხოვრებას, რა არის კარგი და რა არის ცუდი, საიდან მოდის ტკივილი, რა არის სიცოცხლე და სიკვდილი.

კაცობრიობის სულიერი მემკვიდრეობა
აქ ყურადღება ექცევა კაცობრიობის სულიერ მემკვიდრეობას, რელიგიურ ტრადიციებში შემორჩენილ ზოგადსაკაცობრიო ღირებულებებს. როგორ არის დაკავშირებული რელიგია ამა თუ იმ ერის, ხალხის – კულტურული თვითმყოფადობის ჩამოყალიბებასთან.

რელიგიის როლი და მნიშვნელობა
აქ უმნიშვნელოვანესია იმ პასუხისმგებლობისა და როლის წარმოჩენა და განსაზღვრა რომელიც რელიგიურ ორგანიზაციებს აქვთ მსოფლიო მშვიდობაზე. რელიგიური ორგანიზაციების ზრუნვა მსოფლიო პრობლემების მოგვარებაზე, (როგორიცაა ეკოლუგიური, ჯანმრთელობის, უსახლკაროთა, ბავშვების და სხვ.)

ბიბლიური ისტორია როგორც არა მხოლოდ ისტორია არამედ ცხოვრების წესი და ტრადიცია
აქ უმნიშვნელოვანესია მოხდეს გააზრება იმისა რომ ბიბლიური ისტორია ეს არის ცოცხალი სიტყვა ღმერთისა, რომელიც ცოცხლობს მუდმივად, და რომ ის არ არის მხოლოდ წარსული და გახსენება რაღაც პერიოდში მომხდარისა.

დაწყებითი საფეხური
სამყაროს შექმნა და პირველი ადამიანები
ამ საფეხურზე უნდა მოხდეს სამყაროს შექმნის შესახებ სწორი და მართებული სწავლების გაცნობა და ათვისება. როგორ შექმნა ღმერთმა სამყარო, პირველი ადამიანები, მათი ცხოვრება სამოთხეში, ცოდვით დაცემა და მისი შედეგები, მართალი ადამიენები და მათი ცხოვრების წესი, ბაბილონის გოდოლის ისტორია და მისი მნიშვნელობა, კერპთაყვანისმცემლობა და მართალი აბრაამი, ღმერთის რჩეული ერის ჩამოყალიბება, პატრიარქების ისტორია, ისრაელის გამრავლება და ეგვიპტეში ცხოვრება, ეგვიპტიდან გამოსვლა და აღთქმული ქვეყნის დამკვიდრება.
როგორ სრულდება ღმრთის ნება და სურვილი ამ ისტორიებში.
ურთიერთობა ღმერთსა და ადამიანებს შორის
ამ საფეხურზე მიმართულების მიზანია მიზეზ შედეგობრივი ურთიერთობების დანახვა ღმერთისა და ადამიანებს შორის ურთიერთობისას. დაკავშირება და ანალიზი ადამიანის ღმერთთან ურთიერთობისას და ღმერთისაგან განშორებისას.
ბიბლიური ისტორიის როლი და მნიშვნელობა კაცობრიობის ისტორიაზე ზოგადად და თანამედროვე ეტაპზე
ამ საფეხურზე, მიმართულების ძირითადი მიზანია გააზრება იმისა თუ რატომ არის ამ ისტორიის შესწავლა სასარგებლო, აუცილებელი და მნიშვნელოვანი. რაში უნდა დაეხმაროს მათი ცოდნა მოსწავლეებს და როგორ უნდა გამოიყენონ ისინი.
ანალიზი და პარალელები
ამ საფეხურზე მიმართულების სწავლების მიზანია მოწაფეებმა შეძლონ პარალელების მოძებნა და გაანალიზება (მარტივ დონეზე), თუ როგორ ვხვდებით დღეს ბიბლიური ისტორიის ანალოგიებს. ჩამოუყალიბდეთ აზრის გამოთქმისა და დასაბუთების ელემენტარული უნარ ჩვევები.

საბაზო საფეხური
ბიბლიური ისტორიის ზნეობრივი საკითხები
ამ საფეხურზე მოწაფემ უნდა გაიღრმავოს თავისი ცოდნა ბიბლიური ისტორიის შესწავლის საფუძველზე. გაეცნოს ქრისტიანული მოძღვრების გავრცელების ისტორიას და პირველ ქრისტიანთა ცხოვრების წესს.

საეკლესიო ეთიკის ჩამოყალიბება
ამ საფეხურზე მიმართულების მიზანია მოწაფეები გაეცნონ ქრისტიანობამდელი ზნეობრივი ცხოვრების მაგალითებს და დაუკავშირონ ისინი ქრისტიანობას. რა კავშირია რელიგიასა და ეთიკას შორის. გაეცნონ თანამედროვე საზოგადეობის ეთიკურ წანამძღვრებს.
ეკლესიის ისტორია და საეკლესიო მწერლობა
ამ საფეხურზე მიმართულების მიზანია ეკლესიის ისტორიაში განსაკუთრებული როლის მქონე პიროვნებების ღვაწლის გაცნობა. როგორ აისახებოდა და აისახება მათ ცხოვრებაში ცოცხალი ურთიერთობა ღმერთთან. რა მოტივები უბიძგებდათ მათ ამ ურთიერთობისაკენ.
ოჯახი, სკოლა, ეკლესია
ამ საფეხურზე მიმართულების სწავლების მიზანია მოწაფეებს შეეძლოთ ოჯახის, სკოლის და ეკლესიის როლის გააზრება ადამიანის პიროვნებად ჩამოყალიბებაში. როგორ გვეხმარება აქ ბიბლიური ისტორია. როგორ გამოვიყენოთ ისინი ცხოვრებაში და რატომ არის აუცილებელი და სასარგებლო ბიბლიური ისტრორიის შესწავლა.
შეფასების სისტემა ბიბლიურ ისტორიაში

მოსწავლეთა ცოდნის შეფასება წარმოებს 10 ქულიანი სისტემით

შეფასების თითოეულ კომპონენტს მინიჭებული აქვს ქულების გარკვეული რაოდენობა.
კერძოდ:

შეფასების კომპონენტები:
1. საშინაო დავალება
2. საკლასო დავალება
3. შემაჯამებელი სამუშაო

შეფასების კრიტერიუმები:

საშინაო დავალება – წერითი და ზეპირი საშინაო დავალებები და სხვ.
კრიტერიუმები – მოსმენილი საგაკვეთილო საკითხების ცოდნის დონე, ლოგიკური აზროვნების უნარი, აკეთებს დასკვნებს, აქტიურად არის ჩაბმული საშინაო დავალების შემოწმებაში, იცის და იყენებს ახალ სიტყვებს, მოკლედ და ლაკონურად აყალიბებს აზრს, სვამს და პასუხობს კითხვებს, სისტემატურად აქვს დავალება. გააჩნია აზრის მკაფიოდ გადმოცემისა და მსჯელობის უნარი. ფლობს წერითი მეტყველების კულტურას.

საკლასო დავალება – კრიტერიუმები – მოსმენილი საგაკვეთილო საკითხების ცოდნის დონე, ლოგიკური აზროვნების, აზრის მკაფიოდ გადმოცემისა და მსჯელობის უნარი. ამყარებს კონტაქტს აუდიტორიასთან, აქტიურად არის ჩაბმული საგაკვეთილო პროცესში, ზუსტად გადმოსცემს ინფორმაციას, იყენებს ახალ სიტყვებს და ამდიდრებს ლექსიკას, სვამს და პასუხობს კითხვებს ნაცნობ თემატიკაზე, აქვს წერითი მეტყველების კულტურა.

შემაჯამებელი სამუშაო – (ტარდება ყოველ მეხუთე გაკვეთილზე წერით (ბილეთები ან ტესტები), ან ზეპირი ფორმით. შემაჯამებელი სამუშაოს ფორმას საგნის სპეციფიკის გათვალისწინებით განსაზღვრავს მასწავლებელი. შეფასების კრიტერიუმები – სასწავლო კურსის ცოდნის დონე, აკეთებს დასკვნებს, ახერხებს საკუთარი პოზიციის განმარტებას და არგუმენტირებას, გამოხატავს დამოკიდებულებას ნასწავლი თემის მიმართ, თანმიმდევრულად და ლაკონურად გადმოსცემს მოკლე შინაარსს, იყენებს დამატაბით ინფორმაციას და თვალსაჩინოებას, იყენებს ნასწავლ გრამატიკულ სტრუქტურებს და ფორმებს, იყენებს სათანადო ლექსიკას. დამუშავებული ლიტერატურის სისრულე, ლოგიკური აზროვნების, აზრის მკაფიოდ გადმოცემისა და კრიტიკული მსჯელობის უნარი.

შემაჯამებელ დავალებათა ტიპები:
• დამოუკიდებელი სამუშაო ყოველ მეხუთე გაკვეთილზე, სადაც მოწაფეებს ეძლევათ ყოველი გაკვეთილიდან 2 კითხა, რომელსაც წერილობით უნდა გასცენ პასუხი.
• ტესტური სამუშაო სადაც მოწაფეებს ეძლევათ კითხვები სავარაუდო პასუხებით და უნდა შემოხაზონ სწორი პასუხი.
• რომელიმე თემის დამოუკიდებლად დაწერა.
• ზეპირი გამოკითხვა.
• მსჯელობა და ანალიზი რომელიმე ბიბლიურ ფაქტზე და მოვლენაზე.

© ბიბლიური თეოლოგიის შემსწავლელი ცენტრი “ბარძიმი”